Tamazɣa | Tutlayt | Tasekla | Tasenselkimt | Idles | Tussna | Imaziɣen | Ayen nniḍen
Idir: Itri n Udrar Amaziɣ

sɣuṛ  Ameẓyan Tighilt

Idir, d anaẓuṛ, d acennay ameqqʷṛan n Tmazɣa n Ugafa Alemmas, si tama n At Yenni anda ilul ass n 25/10/1945. Idir d isem-is n unaẓuṛ, di nekkwa yers Hamid Cheriet.

Deg yissegʷasen n 70, mi yella yeqqaṛ tasnakalt di tesdawit n Lzzayer tamanaɣt, i yeṭṭef avrid n ccna s Tmaziɣt. Taɣʷect-is d taleggʷaɣt, tgerrez i ccna i yefren. Tizlatin timezwura i d-isuffeɣ imir-nni d "Ers-d ay iḍes" i yecna akkʷed Nouara, d "Vava inu va" i yettwassnen aṭas. Dɣa, tizlit-is "Vava inu va" d tin i d-yezzin i umaḍal, cnan-tt s tutlayin nniḍen deg waṭas n tmura.

Idir d win i yerran talɣa tatrart i uẓawan n Tmaziɣt. Awalen n tezlatin-is d wid i d-yettawin ɣef umezruy d yidles n Yimaziɣen. Gar tezlatin-is, nezmer ad d-nevder kra: Muqleɣ Tamurt Umaziɣ (ɣef tmagit tamaziɣt), Amedyaz (tajmilt i Mouloud Mammeri - mmi-s n At Yenni ula d netta), Ssendu, Tamacahut n Tsekkurt, Cfu, Adrar-inu, atg. Yeccna daɣen akkʷed yinaẓuṛen n tmura tiyaḍ akken ad yezzuzer tutlayt-nneɣ d uẓawan-nneɣ deg umaḍal.

Idir yefka udem atrar i uẓawan amaziɣ. Idir isemlal-d tisutiwin timaziɣin s tezlatin-ines. Idir yeldi-d tiwwura akken ad yettwassen yidles d tutlayt-nneɣ deg umaḍal. Idir yesken-aɣ-d amek ad nidir akken ad tidir Tmaziɣt.

Hamid Cheriet yeǧǧa-aneɣ ass n 2 di Mayu 2020, di Paris. Ma d Idir yedder deg-neɣ s wayen i d-yeǧǧa i Yimaziɣen, i talsa.

03.05.2970/2020 23:45 Ameẓyan Tighilt